English
لسه فاكر كويس جدا أول مرة صليت فيها التراويح في حياتي، لسة فاكر على الرغم من مرور سنين طويلة على الحدث ده، و كأنه محفور في ذاكرتي بكل تفاصيله و احاسيسه، كان يوم عادى في وسط الإسبوع وماكنش عندي أي نية لصلاة التراويح كعادتي، كنت نازل اشترى فاكهة لأنى مصنف بكل جدارة من اخطر مدمني المانجا في العالم كله، حطلي طن مانجا قدامي على الترابيزة وسيبنى ساعة حترجع تلاقيني عايم فيها لحد الركب و مبقع كل هدومي و مش فاضل من الطن غير شوية بذر ..
المهم وانا في طريقي للفكهاني سمعت صوت طالع من واحد من الجوامع جنب بيتي بس صوت مختلف متعودتش أسمعه في منطقتنا بيقرأ القرآن في صلاة التراويح، و من كتر حلاوة الصوت الممزوج بتون مؤثر و فيه نبرة حزن خفيفة جذبنى، جذبنى لدرجة اني لاقيت نفسى بمشي ناحية المسجد على الرغم انى لسة معنديش نية الصلاة.
في الزمن ده كنت لسة بعيد و بحس ان صلاة التراويح من كتر ما هي طويلة يستحيل على واحد زيي يصليها، دي محتاجة من وجهة نظري التعبانة وقتها كوكتيل من شجاعة بطل مغوار مخلوطة على صبر ايوب علشان اقدر استحمل افضل واقف أصلى كل ده.
نقطة تحول
وفضلت اقرب من المسجد كأن الصوت سحرني أو النداهة ندهتلي و لقيت نفسى بدل ما اشترى المانجا بدخل المسجد في حركة فجئتني انا شخصيا و بحشر نفسي وسط الناس و بصلي، وفاكر كويس أوى قد ايه كنت مركز في كل كلمة الإمام بيقولها و بدأت لأول مرة استشعر حلاوة غريبة في قلبي و كأني بسمع القران لأول مرة في حياتي، و عدت عليا صلاة التراويح كلها كأنها ركعتين خفيفتين، و في صلاة الشفع قرأ الإمام سورة الفجر انا طبعا وقتها ولا كأن عندي فكرة دي سورة ايه اصلاً ولكنى بحثت بعدها و عرفت و توقف الامام عند آية
" یَوۡمَىِٕذࣲ یَتَذَكَّرُ ٱلۡإِنسَـٰنُ وَأَنَّىٰ لَهُ ٱلذِّكۡرَىٰ ٢٣ یَقُولُ یَـٰلَیۡتَنِی قَدَّمۡتُ لِحَیَاتِی ٢٤ " ...
و فضل يكررها و هو في قمة التأثر و نزلت الآية على قلبي زي الصاعقة و هزتني من جوا لدرجة انى حسيت برعشة بتجري في جسمي كله، ولأول مرة استشعرت البكاء من خشية الله لدرجة انى اتلخبطت، انا عمر ما دموعي نزلت غير لما اكون زعلان او مضايق ودايما بيصاحبها شعور بالضيق و الحزن و لكن المرة دي مختلفة تماما ، اول مرة دموعي تنزل من التأثر و مش أي تأثر، التأثر بكلام الله و على عكس شعور القبضة اللي متعود عليه مع البكاء العادي، انا حاسس ان قلبي بينشرح وكأنه بيتغسل من جوا، في البداية اتخضيت واتكسفت شوية و انا في وسط المصليين و حاولت امسك دموعي بكل ما أوتيت من قوة و لكنها كانت اقوى منى و بدأت تنزل قطرات تبل السجادة وانا واقف مذهول و في قمة التأثر ، كانت من أحلى الصلوات اللى صليتها في حياتي، وبعد كدة بدأ الإمام يدعى اثناء صلاة الوتر دعوات عمرى ما كنت سمعتها قبل كدة لمستني من جوا و حسيت بنافورة دموع نازلة،
الجندى المجهول
جالي فضول بعد انتهاء الصلاة انى اشوف مين الامام ده؟
والعجيب انى لاقيته واحد شاب عادى جدا مش شيخ ولا حاجة لابس ملابس رياضية وعرفت من أحد المصلين انه شاب موظف في شركة محب للقرآن وبيتطوع انه يحفظ الأولاد الصغيرة في وقت فراغه ولما غاب مرة امام المسجد الأصلي صلى هو بالناس فالقائمين على المسجد من حلاوة صوته عرضوا عليه انه يصلى بيهم التراويح كل سنة وقد كان،
والغريب ان الجامع ده في منطقة تانية خالص ولكن الصدفة هي اللي جبته في اليوم ده بس في الجامع اللي جنبي علشان اسمعه وانا نازل اشترى المانجا علشان يحببني في صلاة التراويح، سبحان مدبر الأمور، و طبعا مش محتاج اقولكم ان من ساعة اليوم ده لحد النهاردة و أنا بصلي التراويح و دايما بحاول ادور على امام صوته حلو اصلى وراه فهي بتعمل مفعول السحر معايا،
الفرحة مبتكملش
وعلى الرغم من حلاوة البدايات مع مرور الوقت و التكرار وتحول العبادة إلى عادة في حياتنا، صحيح الواحد بيكون سعيد جدا انه اصبح منتظم في العبادة ولكنه احيانا كتيرة يبتدي يألفها و يفقد تركيزه واحساسه بيها و تتحول لعمل أوتوماتيكي بيعمله ومخه مشغول بحاجة تانية وواحدة واحدة احساس البدايات الرائع ده يختفي تدريجيا..
20 نقطة لمحاولة استرجاع احساس حلاوة البدايات
و بسبب انه كان بيوحشني جدا احساس حلاوة البدايات و كان نفسى استرجعه تاني خصوصا في رمضان فعملت محاولات كتير على مر السنين في محاولة لاسترجعها و طلعت بشوية نقط نفعتني جدا ... و جايز لو جربت حاجة منها تجيب نتيجة معاك انت كمان وهى:
➊ في كل رمضان جرب تعمل عبادة او عمل صالح او مساعدة للناس او تطوع جديد عليك معملتوش قبل كدة ابدا واستشعره بكل حواسك.
➋ اقرأ قبل كل رمضان كتاب او اسمع درس عن كيفية الخشوع في العبادات و حاول تطبق اللى تقدر عليه .
➌ استشعر دايما ثواب أي عبادة او عمل صالح قبل اما تعمله ولو مش عارف ثوابه اسال او اقرأ عنه.
➍ اذكر ربنا وانت بتتمشى او قاعد في مكان فيه مناظر طبيعية جميلة بتحبها و خد انفاس عميقة من الهواء النقي واستشعر كل كلمة بتقولها مع تفعيل قلبك وعقلك ولسانك في نفس الوقت.
➎ اختار بعض صور القران اللى بتحبها واقرا تفسيرها من كتاب تفسير نرتاح له.
➏ اشترى كل رمضان مصحف جديد شكله مختلف يكون عجبك واتبرع بمصحفك القديم لمسجد ينقصه مصاحف.
➐ علق زينة رمضان في بيتك بمساعدة اولادك واخواتك وانشر جو من البهجة والترقب لدخول رمضان.
➑ حاول تحشر نفسك وسط صحبة صالحة مستواهم الإيماني اعلى منك وراقبهم واتعلم منهم.
➒ تابع برنامج روحاني يومي يشحن بطارية ايمانك.
➓ اشترى هدايا للناس القريبين منك واللي بتحبهم في رمضان ويا سلام لو الهدايا دي تكون بتقربهم من ربنا زى سبحة او مصحف او سجادة صلاة او كتاب روحاني او غيره.
➊➊ تطوع في عمل خيري تكون بتحبه واجتهد فيه وخلي النية خالصة لله.
➋➊ اجعل لك عمل صالح سرى خاص بينك وبين ربنا فقط.
➌➊ شكل بين العبادات في جماعة ومع اهلك ما بين صلوات ودعوات واذكار و بين العبادات الفردية لوحدك في في ركن هادى منعزل مخصوص لك في بيتك.
➍➊ حاول تكون انت المبادر جمع اولادك او اصحابك على عمل خير معين زى تجهيز شنط رمضان او مساعدة محتاج او توعية او غيره وحاول تجعلها عادة سنوية بنية انها تستمر من بعدك.
➎➊ اغتنم العبادة قدر المستطاع في الثلث الاخير من الليل فلها حلاوة مختلفة عن اى وقت في اليوم.
➏➊ افطر بالراحة واستشعر حلاوة نعمة الاكل والشرب ومتفتريش علشان تفضل خفيف في التراويح.
➐➊ في اى وقت تحس بهم او تحدى بيواجهك .. اقعد ركز وكرر جواك إنك متوكل على الله في الموضوع ده بذاته و اعمل اللى تقدر عليه و متشلش هم.
➑➊ لو مضايق من حد حاول تسامحه علشان تريح نفسك وسامح نفسك برده وخلى عندك امل كبير انك تطلع من رمضان و قد عفا الله عنك.
➒➊ اشترى لأولادك او احبائك هدايا للعيد وخبيها وفاجئهم بيها اول يوم العيد بنية انك تحببهم في العيد.
⓿➋ و في النهاية لو كان صوتك حلو استغل موهبتك و اتعلم التجويد و اترقى لحد اما في يوم تلاقى نفسك بتصلى بالناس في التراويح و بتصطاد بصوتك الرائع واحد ضايع كان برده نازل يشترى مانجا و تتفاجىء يحسنات كل صلوات التروايح بتاعته يوم القيامة في ميزان حسناتك.
انت كمان لو جربت حاجة وجابت معاك نتيجة شاركها معانا