العلاقات في رمضان: فرصتك للتواصل بإحسان

رمضان مش بس شهر الصيام والصلاة، لكن كمان شهر العلاقات، العلاقات اللي يمكن الوقت سرقها، أو المشاكل بعدتها، أو حتى زحمة الحياة خلتنا نأجلها لوقت مش عارفين ييجي إمتى.

رمضان بييجي كل سنة علشان يقولك ان حواليك ناس كتير وعلاقات مختلفة بس محتاج تفتكرها وتركز معاها.

رمضان مش بس فرصة نقرب من ربنا، لكنه كمان فرصة نقرب من بعض، نصلح اللي محتاج يتصلح، ونعيد بناء جسور التواصل، شهر الخير بييجي عشان يعلمنا مش بس الصيام، لكن كمان الصبر، التسامح، والإحسان.. ودي كلها أساسيات أي علاقة ناجحة.

رمضان.. لحظة " Restart " للعلاقات

عارف لما تليفونك يهنج ويبقى الحل الوحيد إنك تعمله  Restart؟ رمضان بيعمل كده في علاقاتنا، بيخلينا نقف ونعيد حساباتنا ونشوف:

✔ مين واحشنا وماكلمناهوش من زمان؟

✔ مين زعل منا ونقدر نصالحه؟

✔ مين محتاج دعوة من قلبنا حتى لو بعيد؟

ورسولنا الكريم بيأكد على أهمية صلة الرحم والعلاقات الإنسانية في قوله:

" ومَن كانَ يُؤْمِنُ باللَّهِ واليَومِ الآخِرِ فَلْيَصِلْ رَحِمَهُ،"   

الصدقة مش بس فلوس واطعام طعام!

كلنا بنركز في رمضان على الصدقات، هتتصدق بكام وفين، وهتشارك في اطعام الطعام ازاي؟ ... بس ياترى بنسأل نفسنا هنجبر خاطر مين وازاي؟

قال نبينا الحبيب: "الكلمة الطيبة صدقة" (رواه البخاري ومسلم)،

رمضان فرصة إننا نجرب طاقة الكلمة الحلوة

✔ رسالة لحد مختفي من حياتنا بقاله فترة.

✔ مكالمة نعيد بيها صلة مقطوعة.

✔ ابتسامة بسيطة في وش حد يمكن يكون محتاجها أكتر مما نتخيل.

العزومات مش للأكل بس!

عزومات رمضان بتجمعنا بالعيلة والأهل والاصحاب، لكن السؤال: هل بنتكلم مع بعض فعلاً؟ ولا بنبقى يادوب بناكل مع بعض وبعد الفطار بيبقى كل واحد في عالمه الخاص؟!
ليه ما نخليش الفطار فرصة:

✔ نطمن على بعض ونسمع بعض بجد

✔ نجبر خاطر بعض ونعبر عن امتنانا لوجودنا وسطهم 

✔ نتشارك اخبارنا الحلوة ونشجع بعض على عبادة تجمعنا 

وافتكر دايما ان ربنا سبحانه وتعالى قال: "وَٱعْبُدُواْ ٱللَّهَ وَلَا تُشْرِكُواْ بِهِۦ شَيْـًٔا وَبِٱلْوَٰلِدَيْنِ إِحْسَٰنًا وَبِذِى ٱلْقُرْبَىٰ"  النساء: 36
يعني علاقتنا بأهلنا وأقاربنا عبادة، مش مجرد عادة اجتماعية.

المسامحة قوة مش ضعف

فيه ناس جرحونا أو بعدوا عننا بطرق مؤلمة، ورمضان بييجي كفرصة إن قلبنا يكون أخف.

 المسامحة مش معناها إننا نرجع زي الأول، لكن معناها إننا نخفف عن نفسنا ثقل الغضب والكره.

قال الله سبحانه وتعالى "  وَأَنْ تَعْفُوا أَقْرَبُ لِلتَّقْوَى وَلَا تَنْسَوُا الْفَضْلَ بَيْنَكُمْ إِنَّ اللَّهَ بِمَا تَعْمَلُونَ بَصِيرٌ" البقرة 237

ونبينا الحبيب ﷺ قال:

"ليس الواصل بالمكافئ، ولكن الواصل الذي إذا قطعت رحمه وصلها" (

جرب تبعت رسالة "رمضان كريم" لشخص بينك وبينه خلاف.. حتى لو مش هيرد، إنت عملت اللي عليك.

العطاء.. مفتاح الحب والبركة

رمضان شهر العطاء، لكن العطاء مش بس مادي. ممكن يكون من وقتك، من اهتمامك، من دعواتك. جرب:

✔ تساعد حد محتاج بدون ما يستنى منك حاجة.

✔ تهتم بحد محسّسك إنه مش مهم.

✔ تدعي لشخص بينك وبينه مسافة، يمكن ربنا يجمعكم تاني.

النبي ﷺ قال: "أحب الناس إلى الله أنفعهم للناس" رمضان فرصة نكون ناس بتضيف للحياة، مش بس ناس بتعيشها.

علاقاتنا بالله.. وعلاقاتنا بالناس

علاقتنا بربنا جزء كبير منها بيعتمد على تعاملنا مع الناس. النبي ﷺ قال: "خَيرُكُم خَيرُكُم لأهلِهِ"

 يعني مقياس الخير فيك هو علاقتك بأهلك، بأصحابك، بالناس اللي حواليك. رمضان فرصة نعيد النظر في تعاملاتنا ونحسنها.

 جرب في رمضان:

·       كل يوم، ابعت رسالة أو كلم شخص ما كلمتهوش من زمان.

·       حاول تفطر أو تتسحر مع حد بتحبه.

·       سامح شخص واحد، حتى لو بينك وبين نفسك.

·        كل يوم، قول كلمة طيبة لشخص مختلف.

·        خلي جزء من دعائك اليومي لشخص مختلف كل يوم، وقوله انك دعيت له، او سأله قبلها هدعيلك النهارده تحب ادعيلك بإيه ؟صدقني ليها تأثير السحر.

وأكيد بفكر نفسي وافكركم ان كل ده في نطاق متوازن من غير ما نأثر على وقتنا الخاص في من قراءة القرآن وصلاة وقيام الليل وكل العبادات الي بترتقي بأرواحنا

ومستنينك تشاركنا ايه اكتر حاجه حسيت انك عايز تبدأ بيها من النهارده؟ 

بقلم: حنان سعيد